अब गीताको श्लोकको अर्थतिर पनि जानुपर्ने छ हामीलाई ।
श्लोक ३४
अर्जुन भगवानसँग आफ्नो तर्क यसरी राख्दैछन्, हाम्रा
आचार्य, पिता, पुत्र र त्यस्तै प्रकार पितामह, मामा, ससुरा, नाति, सालाहरु
तथा अरु जति पनि सम्बन्धीहरु छन् ।
श्लोक ३५
यिनीहरुले
मलाई प्रहार नै गरे पनि म यिनीहरुलाई मार्न चाहन्न, र हे मधुसूदन! मलाई
त्रिलोकीको नै राज्य मिले पनि म यिनीहरुलाई मार्न चाहन्न, फेरि यो पृथ्वीको
राज्यकोलागि त यिनीहरुलाई के मार्नु?
यी दुइ
श्लोकहरुमा अर्जुनले युद्धको सम्पूर्ण जिम्मेवारी आफूले मात्र लिन खोजेका
छन् । आफूलाई पूरापूर कर्ता र भोक्ता मान्दैछन अर्जुन । यो कर्ता र भोक्ता
भावले नै हामीलाई दुःख दिने हो । जो कर्ता हुन्छ, उसले भोक्ता हुनै पर्छ,
कर्ता र भोक्ता हुनेले दुःख पाउनै पर्छ । शास्त्रले हामीलाई यही भाववाट
छुट्न सिकाउँछ । गीताको प्रसिद्ध श्लोक छ, 'तिम्रो कर्ममा मात्रै अधिकार छ,
फलमा छैन' । किनभने, हामी कर्म गर्न स्वतन्त्र छौं, तर कर्मको फल हाम्रो
हातमा छैन । कर्मको फल आफूले आफूलाई दिन पनि सकिंदैन । आफूले परिक्षा
दिने, आफूले नै आफूलाई नम्वर दिने, आफूले नै आफूलाई पास गर्ने कुरा कहीं
पनि कहिले पनि सम्भव छैन । अर्को कुरा, हामी कर्म गर्ने वेलामा वास्ता
गर्दैनौं, तर कर्मफल आफूले सोचे जस्तो हुनु पर्छ भन्ने धारणा राख्छौं ।
हाम्रो सबभन्दा ठूलो गल्ती नै यही हो ।
तर वास्तवमा
महाभारतको युद्ध अर्जुनको आफ्नो इच्छावाट मात्रै भएको होइन भन्ने हामी
सबैलाई थाहा छ । अर्जुनमा यस्तो विचार आउनुको कारण पनि उनमा भएको मोह नै
हो, अविवेकको नै हो । आउँदो दोस्रो अध्यायमा भगवान यही कुरालाई लिएर उपदेश दिनुहुन्छ ।
श्लोक ३६
हे
जनार्दन! यी धृतराष्ट्रका सम्बन्धीहरुलाई मारेर हामीहरुलाई के खुशी होला
र? यी आततायीहरुलाई मार्दा पनि हामीलाई पाप नै लाग्नेछ ।
यहाँ अर्जुन
'आततायी' मारेर आफूलाई पाप लाग्ने कुरा गर्छन । वास्तवमा, आततायीहरुको त
नाश हुनैपर्छ । किनभने आतातायीले नै समाजलाई दुःख दिन्छन, आततायीको वध भएन
भने सारा समाज वरवाद हुन्छ, राष्ट्रमा अराजकता फैलन्छ । यहाँ भगवानको समेत
सल्लाह अनुसार महाभारतको युद्ध हुँदैछ यी आततायीको नाश गर्न,
उता अर्जुन भन्दैछन, 'आततायीलाई मारयो भने पाप लाग्छ' । व्यक्तिको बुद्धि
भ्रमित भयो भने के गर्न हुने, के गर्न नहुने, के वोल्न हुने भन्ने कुराको
पत्तो हुँदैन । भक्तिमति कुन्तीका पुत्र अर्जुनको त यो चाल छ भने भने
हाम्रो चाल के होला?
श्लोक ३७
यसैले
आफ्ना वान्धव यी धृतराष्ट्र-सम्बन्धीहरुलाइ मार्नकोलागि हामी योग्य छैनौं ।
किनकि हे माधव ! आफ्ना कुटुम्बीहरुलाई मारेर हामी कसरी सुखी हुन सकौंला ?
अर्जुनको यो कथन साधारण परिस्थितिमा एकदम सत्य हो । तर अहिलेको विशेष परिस्थितिमा अर्जुनको यो विचार गलत छ ।
यो
अध्यायमा हामी अर्जुनको यस्तो प्रलाप मात्रै पढ्छौं । तर, गीता सहित अन्य
सबै शास्त्रले भन्छन, हामीले आफ्नो कल्याण चाहने हो भने आफूलाई 'प्रेय'
मार्ग वाट हटाएर 'श्रेय' मार्गतिर उन्मुख गर्नुपर्छ । यसकोलागि निरन्तर
शास्त्रको अध्ययन गर्नुपर्छ, र सत्संग गर्नुपर्छ । शास्त्र आफैंले पढ्दा
बुझ्न गाह्रो हुन्छ, त्यसैले आफूले नबुझेका धेरै कुरा सत्संगवाट प्रष्ट
हुन्छ ।
मैले हालै
सुनेको एक महात्माको प्रवचनमा उहाँ भन्नुहुन्छ, 'म एक चोटी घरवाट घुम्न
निस्कें । जाँदा जाँदै एउटा शिव मन्दिरमा पुगें । त्यो वेला सूर्य अस्त
हुनै लागेको थियो । मैले शिव लिङ्गको अगाडि गएर शिवजीको दर्शन गरें ।
त्यही वेला मेरो छायाँ शिव लिंगमा पर्यो । शिव मन्दिरवाट फर्कंदै गर्दा
कुनै कामले म वीच वाटोमा रोकिएँ, त्यही वेला एउटा कुकुरले आएर मेरो छायाँमा
पिशाव गर्यो । अव म के गरौँ, मेरो छायाँ शिव लिङ्गमा पर्दा खुशी होउँ कि
मेरो छायाँमा कुकुरको पिशाव पर्दा दुःखी होउँ ।'
हजुरहरुले यो कुराको विचार गर्नुपर्यो । यसको अर्थ वारे चर्चा पछि हुन्छ ।
लौ त हजुर, आजलाई यत्ति ।
Song: Ma Hu Sadbhaba ko sathi
No comments:
Post a Comment