No. 36
चालीसौं श्लोकको नै विस्तार:
अहिले
यो प्रसंग समताको नै छ । समबुद्धिरूप धर्मको ज्यादै कम अनुष्ठान पनि
जन्म-,मरणरूपी महान् भयवाट हाम्रो रक्षा गर्छ । सकाम कर्म फल (राम्रो,
नराम्रो) दिएर नष्ट हुन्छ, तर समता धन-सम्पति आदि कुनै फल दिएर नष्ट हुँदैन
अर्थात् यसको फल नाशवान धन-सम्पति आदिको प्राप्ति हुने होइन । साधकको
अन्तःकरणमा अनुकूल-प्रतिकूल वस्तु, व्यक्ति, घटना, परिस्थितिमा जति समता
आउँछ, त्यति नै उसको समता अटल (नहराउने) हुन्छ । यो समताको कुनै पनि कालमा
नाश हुन सक्तैन ।
जस्तो योगभ्रष्ट
(गीताकै छैठौँअध्यायमा आउने प्रसङ्ग) लाइ साधन सामग्रीमा समता आउँछ,
अर्थात्, त्यो योगभ्रष्ट साधकलाई आफूसँग भएको साधन सामग्रीमा आसक्ति र ममता
हुँदैन । उसका साधन-सामग्री द्वारा ऊ स्वर्ग आदि उँचा लोकहरुमा धेरै
वर्षसम्म सुख भोग पनि गर्छ, त्यसपछि उसको जन्म मृत्युलोकमा
श्रीमानहरुको घरमा हुन्छ । त्यो नयाँ जन्ममा पनि उसले ती साधन
सामग्री भोग्दा पनि ती साधन-सामग्रीको नाश हुँदैन । त्यो समता, ती
साधन-सामग्री अलिकति पनि खर्च हुँदैन, जस्ता-को-तस्तो सुरक्षित रहन्छ,
किनकि यो समता सत् हो, सदा सर्वदा रही रहने स्वभावको हो ।
पहिले पनि भनी
सकियो, सम परमात्माको अर्को नाम हो. सम परमात्मासँग एक भएको व्यक्तिलाई
यहाँ समतामा स्थित व्यक्ति भनिएको हो । वास्तवमा, समता ज्ञानीकै लक्षण हो ।
अध्यात्म भनौं, वेदान्त भनौं, विषय नै नयाँ भएकोले शुरु शुरुमा हामीलाई
यस्ता प्रसंग अनौठो लाग्न सक्छ । तर के गर्ने हजुर, गीताले हामीहरुलाई
आफ्नो जीवनको सत्यतर्फ नै हिंड्न लगाउँछ, आफूले गरेका सम्पूर्ण
कृयाकलापहरुमा निष्पक्ष तरिकाले, वकिल भएर होइन, न्यायाधीश भएर अवलोकन गर्न
सिकाउँछ । choice हाम्रै हातमा छ, गीता अनुसार चल्ने कि अहिलेसम्म हामीले
जे जस्तो गरेर वसेका छौँ, वांकी जीवन पनि त्यसै गरी विताएर आफ्नो आयु
समाप्त गर्ने । शास्त्रले, अझ गीताले यी दुइमध्ये कुनै एकको चयन
गर्ने स्वतन्त्रता हामीलाई दिएको छ ।
धर्म दुइ थरी
हुन्छन् -- (१) दान गर्नु, प्राणीहरुलाई पानी पिउनकोलागि आवश्यक व्यवस्था
मिलाउनु, अन्नक्षेत्र खोल्नु आदि परोपकारको कार्य गर्नु र (२ ) वर्ण-आश्रम
अनुसार शास्त्र-विहित आफ्नो कर्तव्य-कर्म तत्परताले पालन गर्नु । यी
धर्महरु निष्कामभावले पालन गरे समतारूप धर्म स्वतः आउँछ, किनकि यो समतारूप
धर्म स्वयमको धर्म अर्थात् स्वरूप हो । यही कुरालाई लिएर यहाँ समबुद्धिलाई
धर्म भनियो ।
गीताको दृष्टिमा
समता अत्यन्त ऊँचो चीज हो । अरु लक्षण हुन्, अथवा नहुन, तर कुनै
साधकमा समता छ भने उसलाई गीता सिद्ध भन्छ । तर, जसमा अरु लक्षण सबै छन् र
समता छैन भने उसलाई गीता सिद्ध भन्दैन ।
समता दुइ किसिमको
हुन्छ -- अन्तःकरणको समता र स्वरूपको समता । समरूप परमात्मा सर्वत्र
परिपूर्ण छ । त्यो समरूप परमात्मामा जो स्थित भएको छ, उसले
सम्पूर्ण संसारमा बिजय पायो, ऊ जीवनमुक्त भयो । तर यसको परिचय
साधकको अन्तःकरणको समताले हुन्छ । अन्तःकारणको समता हो -- सिद्धि-असिद्धिमा
सम रहनु । प्रशंसा होस् या निन्दा, कार्य सफल होस् अथवा नहोस्
लाखौँ रुपियाँ आओस या लाखौं रुपियाँ जाओस्, तर तिनवाट उसको अन्तःकरणमा
कुनै हलचल हुँदैन, सुख-दुख, हर्ष-शोक आदि हुँदैन । यो समताको नाश कहिले पनि
हुँदैन । कल्याण सिवाय यो समताको अर्को कुनै फल नै छैन ।
हामीले गर्ने अथवा
गरेका तप, दान, तीर्थ, व्रत, आदि कुनै पनि पुण्य-कर्म फल दिएर नष्ट हुन्छ,
तर साधन गर्दा गर्दा अन्तःकरणमा थोरै मात्र पनि समता आयो भने त्यो नष्ट
हुँदैन, उल्टो त्यसले साधकको कल्याण नै गर्छ । साधनमा समता जस्तो ठूलो मनको
एकाग्रता पनि होइन । मन एकाग्र हुँदा सिद्धिहरु त आउँछन्, तर कल्याण
हुँदैन । परन्तु समता आउँदा मनुष्य संसार-बन्धनदेखि सुखपूर्वक मुक्त हुन्छ ।
श्लोक ४१
हे
कुरुनन्दन ! यो समबुद्धिको प्राप्तिको विषयमा निश्चयात्मिका बुद्धि एक नै
हुन्छ । जसको एक निश्चय हुँदैन, त्यस्ता मनुष्यहरुको बुद्धिहरु अनन्त र
धेरै शाखाहरु भएका हुन्छन् ।
कर्मयोगको
साधकले प्राप्त गर्न खोजेको लक्ष समता हो, त्यो समता परमात्माको स्वरूप नै
हो । त्यो परमात्मस्वरूप समताको प्राप्तिकोलागि अन्तःकरणको समता साधन हो,
अन्तःकरणको समतामा संसारको राग वाधक हो । त्यही वाधक राग हटाउन अथवा
पामत्मतत्व प्राप्त गर्ने एक निश्चयलाइ व्यवसायात्मिका बुद्धि भनिन्छ ।
व्यवसायात्मिका बुद्धि एक किन हुन्छ ?
यो
बुद्धिमा सांसारिक वस्तु, व्यक्तिको कामनाको त्याग हुन्छ । यो त्याग एक नै
हुन्छ, चाहे धनको कामनाको त्याग होस्, चाहे मान-वड़ाईको त्याग होस् । तर
ग्रहण गर्दा अनेक चीजहरु हुन्छन्; किनकि एक-एक चीज नै अनेक तरहका हुन्छन् ।
यी अनेक तरहका चीजको कामनाहरु पनि अनेक, अनन्त हुन्छन् ।
गीतामा कर्मयोगमा र
भक्तियोगमा व्यवसायात्मिका बुद्धिको वर्णन छ, तर ज्ञानयोगमा
व्यवसायात्मिका बुद्धिको वर्णन छैन । कारण कि ज्ञानयोगमा पहिले स्वरूपको
बोध हुन्छ,फेरि परिणामस्वरूप बुद्धिमा स्वतः एक निश्चय हुन्छ र कर्मयोग र
भक्तियोगमा पहिले बुद्धिको एक निश्चय हुन्छ, त्यसपछि स्वरूपको बोध हुन्छ ।
ज्ञानयोगमा ज्ञानको मुख्यता हुन्छ, कर्मयोग र भक्तियोगमा निश्चयको मुख्यता
हुन्छ ।
सकाम भाव
भएका (आफ्नो कर्मको फल आफूले चाहेको जस्तो खोज्ने) व्यक्तिहरु अव्यवसायी
हुन्छन्, त्यसैले उनीहरु भोग र संग्रहमा आसक्त हुन्छन् । कामनाले गर्दा
यस्ता व्यक्तिहरुको बुद्धि अनन्त हुन्छन्, ती अनन्त बुद्धिहरुका पनि अनन्त
शाखाहरु हुन्छन् । जस्तो धन चाहिएको छ -- यो एक बुद्धि भयो, अव धन
पाउनकोलागि व्यापार गर्ने, चोरी गर्ने, धोखा दिने, अरुलाई ठग्ने, आदि
बुद्धिका अनन्त शाखा भए । यस्ता व्यक्तिहरुको बुद्धिमा परमात्मप्राप्तिको
एक निश्चय हुँदैन ।
वास्तविक उद्देश्य
एक नै हुन्छ । जवसम्म एउटा मात्र उद्देश्य हुँदैन, तवसम्म उसका उद्देश्य
अनेक हुन्छन् र एक एक उद्देश्यका अनेक अनेक शाखाहरु हुन्छन् । त्यो
व्यक्तिका कामना अनेक हुन्छन्, ती कामना पूर्तिका उपायहरु पनि अनेक अनेक
हुन्छन् ।
No comments:
Post a Comment